بیجنگ(این این آئی)چینی وزارتِ خارجہ کی ترجمان ماؤ نِنگ نے کہا ہے کہ چین اور پاکستان نے سی پیک 2.0 کی ترقی کو

تیز کرنے، دوطرفہ آزاد تجارتی معاہدے کو مزید بہتر بنانے اور مصنوعی ذہانت، ڈیجیٹل معیشت، زراعت اور دیگر شعبوں میں تعاون کو فروغ دینے پر اتفاق کیا ہے۔چائنہ اکنامک نیٹ کے مطابق ان خیالات کا اظہار انہوں نے میڈیا کو بریفنگ دیتے ہوئے کیا۔ماؤ نِنگ نے کہا کہ چین اور پاکستان کے درمیان سفارتی تعلقات کے قیام کی 75ویں سالگرہ کے موقع پر یہ دورہ دونوں ممالک کے درمیان خصوصی دوستی کو مزید مضبوط اور بلند کرنے کا باعث بنا۔ انہوں نے کہا کہ اس دورے نے سربراہانِ مملکت کی سفارت کاری، عملی تعاون اور بین الاقوامی ہم آہنگی کے ذریعے چین پاکستان تعلقات کی اسٹریٹجک اہمیت، باہمی فائدے اور قائدانہ کردار کو اجاگر کیا۔ رپورٹ کے مطابق دورے کے دوران دونوں ممالک نے معیشت و تجارت، سائنس و ٹیکنالوجی، زراعت و خوراک، انسانی وسائل اور دیگر شعبوں میں تعاون سے متعلق متعدد معاہدوں پر دستخط کیے۔ماؤ نِنگ نے کہا کہ دنیا ایک صدی میں نہ دیکھی جانے والی تیز رفتار تبدیلیوں سے گزر رہی ہے۔

چین اور پاکستان اپنی جدت کاری اور مختلف شعبوں میں دوطرفہ تعاون کے حوالے سے نئے مواقع اور اہم موڑ پر کھڑے ہیں۔ رپورٹ کے مطابق انہوں نے زور دیتے ہوئے کہاکہ چین پاکستان کے ساتھ اعلیٰ سطحی سیاسی اعتماد، عملی تعاون، سیکیورٹی تعاون اور بین الاقوامی ہم آہنگی کو مزید فروغ دینے کے لیے تیار ہے تاکہ چین پاکستان تعلقات کا ایک نیا باب رقم کیا جا سکے۔