ریاض (نیوز ڈیسک) سعودی حکومت نے مختلف اقسام کے ویزا رکھنے والے غیر ملکیوں کو سہولت فراہم کرتے ہوئے ویزا اسٹیٹس درست کرنے کی خصوصی مہم کا آغاز کر دیا ہے۔
سعودی وزارت داخلہ کے اعلان کے مطابق 25 فروری 2026 تک ختم ہونے والے ویزوں پر نرمی دی گئی ہے، جس سے وزٹ، عمرہ، ٹرانزٹ اور فائنل ایگزٹ ویزا رکھنے والے افراد فائدہ اٹھا سکیں گے۔حکام کا کہنا ہے کہ ویزا میں توسیع کے لیے آخری تاریخ 18 اپریل 2026 مقرر کی گئی ہے۔ مقررہ فیس کی ادائیگی کے بعد ویزا کی مدت میں اضافہ ممکن ہوگا۔مزید یہ کہ جن افراد کے پاس تصدیق شدہ ٹکٹ موجود ہوگا، انہیں 18 اپریل سے پہلے ملک چھوڑنے کی صورت میں کسی جرمانے کا سامنا نہیں کرنا پڑے گا اور فوری روانگی کی اجازت دی جائے گی۔
وزارت داخلہ نے ہدایت کی ہے کہ تمام متعلقہ افراد مقررہ مدت کے اندر اپنے ویزا معاملات درست کر لیں اور خلاف ورزی سے بچنے کے لیے مقررہ تاریخ تک سعودی عرب سے روانہ ہو جائیں۔
