اسلام آباد (نیوز ڈیسک) وزیراعلیٰ پنجاب کے وژن کے تحت صوبے کے عوام کو ریلیف دینے کے لیے گھی اور کوکنگ آئل کی قیمتوں میں خصوصی کمی کا اعلان کر دیا گیا ہے۔

نجی ٹی وی رپورٹ کے مطابق ڈی جی فوڈ اتھارٹی عاصم جاوید اور پاکستان گھی ملز مالکان کے درمیان ملاقات کے بعد وزیراعلیٰ پنجاب کی معاونِ خصوصی سلمیٰ بٹ نے بتایا کہ رمضان المبارک کے دوران تمام برانڈز کے گھی اور آئل پر فی کلو یا لیٹر پیکنگ میں 10 سے 16 روپے تک رعایت دی جائے گی۔حکام کا کہنا ہے کہ رمضان میں صارفین کو مناسب قیمت پر معیاری گھی اور آئل کی فراہمی یقینی بنائی جائے گی، جبکہ اگر آئندہ پام آئل کی عالمی قیمتوں میں کمی آئی تو صنعت اور اتھارٹی کی مشاورت سے مزید ریلیف دینے پر بھی غور کیا جائے گا۔ڈی جی فوڈ اتھارٹی نے اس موقع پر کہا کہ مارکیٹ میں معیاری مصنوعات کی دستیابی کے لیے جدید نظام متعارف کرانا ضروری ہے، خاص طور پر ٹرانس فیٹی ایسڈ کم کرنے کے لیے کم لاگت جدید طریقے موجود ہیں جن پر عمل درآمد کیا جا سکتا ہے۔

انہوں نے مزید بتایا کہ گھی کے معیار کی جانچ کے نظام کو عالمی معیار کے مطابق بنایا جا رہا ہے اور ناقص معیار کی مصنوعات فراہم کرنے والوں کے خلاف سخت کارروائی ہوگی۔چیئرمین گھی ملز ایسوسی ایشن نے کہا کہ فوڈ اتھارٹی کی رہنمائی سے نہ صرف مصنوعات کے معیار میں بہتری آئی بلکہ فیکٹریوں کے انتظامی نظام میں بھی مثبت تبدیلی دیکھنے میں آئی ہے۔