اسلام آباد (نیوز ڈیسک) حکومت نے فیصلہ کیا ہے کہ پہلے سے موجود سولر صارفین سے نیٹ بلنگ وصول نہیں کی جائے گی۔
وفاقی وزیر برائے پاور ڈویژن اویس لغاری نے نجی ٹی وی پروگرام میں گفتگو کرتے ہوئے بتایا کہ آئندہ ایک ماہ تک نیٹ میٹرنگ پالیسی میں کسی قسم کی ترمیم نہیں کی جا رہی۔ ان کے مطابق یہ فیصلہ وزیراعظم کی ہدایت پر کیا گیا ہے۔انہوں نے واضح کیا کہ مجوزہ نیٹ بلنگ پالیسی صرف نئے سولر صارفین پر لاگو ہوگی، جبکہ حکومتی اتحادی جماعتیں بھی سولر صارفین کے لیے نیٹ میٹرنگ کے خاتمے کی مخالفت کر رہی ہیں۔ وزیر نے یہ بھی کہا کہ ان کے اپنے گھر میں بھی اس پالیسی پر اختلاف رائے موجود ہے۔
