اسلام آباد(نیوز ڈیسک)پاکستان ٹیلی کمیونی کیشن اتھارٹی (پی ٹی اے) نے عوام کو بڑی سہولت فراہم کرتے ہوئے 0800 ٹول فری نمبرز پر کی جانے والی

کالز کو مکمل طور پر بلا معاوضہ قرار دے دیا ہے۔پی ٹی اے کے مطابق اب موبائل فون استعمال کرنے والے صارفین بھی 0800 نمبرز پر کال کرنے کے لیے کسی قسم کی فیس ادا نہیں کریں گے۔ اس سے پہلے موبائل صارفین سے ان نمبرز پر کال کے چارجز وصول کیے جاتے تھے، جبکہ لینڈ لائن صارفین کے لیے یہ سہولت پہلے ہی مفت دستیاب تھی۔حکام کا کہنا ہے کہ صارفین کی آسانی اور حقوق کے تحفظ کے پیش نظر اس معاملے کا جائزہ لیا گیا۔ اس سلسلے میں ٹیلی کام کمپنیوں، پی ٹی سی ایل، این ٹی سی اور تمام سیلولر آپریٹرز سے مشاورت کی گئی۔ باہمی اتفاق رائے کے بعد یہ فیصلہ کیا گیا کہ ٹول فری نمبرز پر کالز کو مکمل طور پر مفت کر دیا جائے۔پی ٹی اے نے اس موقع پر صارف دوست پالیسیوں اور یکساں ٹیلی کمیونی کیشن سہولیات کی فراہمی کے عزم کو بھی دہرایا ہے۔