اسلام آباد (این این آئی)نیشنل الیکٹرک پاور ریگولیٹری اتھارٹی (نیپرا)نے نیشنل گرڈ کو بجلی فروخت کرنے کے ریٹس کم کر دیئے۔
نئے ریگولیشنز 2026ء کے مطابق پرانے سولر صارفین اپنی بجلی نیشنل گرڈ کو 25روپے 32پیسے فی یونٹ کے پرانے ریٹس پر ہی بیچیں گے مگر نئے صارفین کیلئے نیشنل گرڈ کو بیچی گئی بجلی کے فی یونٹ ریٹ میں 17روپے 19پیسے کی کمی کی گئی ہے، نئے صارف کو اس کی فی یونٹ قیمت 3 گنا سے بھی کم یعنی 8روپے 13پیسے ملے گی، نئے اور پرانے صارفین کیلئے نیٹ بلنگ کا بھی نیا نظام متعارف کرا دیا گیا ، صارف کا یونٹ اب سرکاری یونٹ کے برابر نہیں ہو گا، اب نیشنل گرڈ سے لی گئی ساری بجلی کی فی یونٹ قیمت حکومتی ٹیرف اور سلیبس کے حساب سے ہو گی۔نئے نیٹ میٹرنگ صارفین کیلئے لائسنس کی مدت 7سال سے کم کر کے5سال کر دی گئی ہے ۔
پاور پلاننگ اینڈ مانیٹرنگ کمپنی کے مطابق ملک میں اس وقت 7ہزار میگاواٹ کی صلاحیت کے نیٹ میٹرنگ سولر سسٹم لگ چکے ہیں جبکہ 13ہزار سے 14ہزار میگاواٹ صلاحیت کے ایسے صارفین کا تخمینہ ہے جو آف گرڈ بجلی بناتے ہیں۔
