اسلام آبا د (نیوز ڈیسک ) انٹربینک مارکیٹ میں امریکی ڈالر کے مقابلے میں پاکستانی روپے کی قدر میں مزید بہتری دیکھی گئی ہے۔

کاروباری ہفتے کے دوسرے دن انٹربینک میں ڈالر کی قیمت 3 پیسے کم ہوئی اور یوں یہ 279 روپے 67 پیسے پر آ کر بند ہوا۔اوپن مارکیٹ میں بھی ڈالر کی قدر میں معمولی کمی ریکارڈ کی گئی، جہاں امریکی کرنسی 4 پیسے سستی ہو کر 280 روپے 71 پیسے کی سطح پر پہنچ گئی۔اس کے برعکس یورپی اور برطانوی کرنسیاں مہنگی ہو گئیں۔ اوپن مارکیٹ میں یورو کی قیمت میں 1 روپے 87 پیسے کا اضافہ ہوا جس کے بعد یہ 336 روپے 23 پیسے کا ہو گیا، جبکہ برطانوی پاؤنڈ 2 روپے 2 پیسے بڑھ کر 386 روپے 22 پیسے پر فروخت ہوتا رہا۔دوسری جانب خلیجی کرنسیوں میں ملا جلا رجحان سامنے آیا۔ متحدہ عرب امارات کا درہم 2 پیسے سستا ہو کر 77 روپے 27 پیسے جبکہ سعودی ریال 1 پیسہ کمی کے بعد 75 روپے 38 پیسے پر آ گیا۔

یاد رہے کہ گزشتہ کاروباری روز انٹربینک میں ڈالر 279 روپے 70 پیسے پر بند ہوا تھا۔