اسلام آباد (نیوز ڈ یسک)پنجاب حکومت نے بیوہ خواتین کی مالی مدد کے لیے ایک نئی سپورٹ کارڈ اسکیم کی منظوری دے دی ہے،
جس کا مقصد صوبے بھر میں مستحق بیوہ خواتین کو معاشی سہارا فراہم کرنا ہے۔ یہ منصوبہ زکوٰۃ اینڈ ویلفیئر ڈیپارٹمنٹ کے تحت نافذ کیا جائے گا۔اس اسکیم کے تحت ہر اہل بیوہ خاتون کو ایک لاکھ روپے کی نقد امداد دی جائے گی۔ اگر بیوہ کے زیر کفالت ایک بچہ ہوگا تو اسے مزید پچیس ہزار روپے ملیں گے، جبکہ دو بچوں کی صورت میں اضافی پچاس ہزار روپے فراہم کیے جائیں گے۔ اس مالی معاونت کا مقصد بیوہ خواتین پر بڑھتے ہوئے معاشی بوجھ کو کم کرنا اور ان کے بچوں کی بنیادی ضروریات پوری کرنے میں مدد دینا ہے۔زکوٰۃ اینڈ ویلفیئر ڈیپارٹمنٹ نے اس پروگرام کے لیے مجموعی طور پر چار ارب روپے مختص کیے ہیں۔ حکام کے مطابق یہ فنڈز بیوہ خواتین کی مالی خودمختاری بڑھانے اور انہیں مستقل امدادی ذرائع پر انحصار سے نکالنے میں مددگار ثابت ہوں گے۔ذرائع کا کہنا ہے کہ اس اسکیم کے رواں ماہ کے اختتام تک عملی طور پر شروع ہونے کا امکان ہے،
جس کے بعد مستحق خواتین کے لیے رجسٹریشن کا عمل اور مالی امداد کی فراہمی جلد شروع کر دی جائے گی۔
