اسلام آباد (نیوز ڈیسک )سرکاری نوکری کے منتظر نوجوانوں کے لیے بلوچستان سے خوش آئند خبر سامنے آئی ہے،

جہاں صوبائی حکومت نے بڑی تعداد میں خالی اسامیوں کا اعلان کر دیا ہے۔حکومتی ذرائع کے مطابق گریڈ 1 سے گریڈ 15 تک 25 ہزار سے زائد آسامیوں کو باضابطہ طور پر مشتہر کیا گیا ہے۔ وزیراعلیٰ بلوچستان میر سرفراز بگٹی کا کہنا ہے کہ یہ اقدام میرٹ کو یقینی بنانے اور بہتر طرزِ حکمرانی کے فروغ کے لیے کیا گیا ہے۔وزیراعلیٰ نے بتایا کہ گریڈ 16 اور 17 کی تقریباً 4 ہزار خالی نشستوں کی سمری بلوچستان پبلک سروس کمیشن کو بھجوا دی گئی ہے۔ انہوں نے کہا کہ جن محکموں میں بھرتیوں کے لیے تحریری امتحانات اور انٹرویوز مکمل ہو چکے ہیں، وہاں جلد تقرریوں کے نوٹیفکیشن جاری کیے جائیں گے۔میر سرفراز بگٹی کے مطابق صوبائی حکومت نوجوانوں کو روزگار کے مواقع فراہم کرنے اور شفاف، منصفانہ بھرتی کے نظام کو عملی شکل دینے کے لیے سنجیدہ اقدامات کر رہی ہے۔