اسلام آباد (نیوز ڈیسک) وفاقی دارالحکومت میں اسٹامپ پیپرز میں جعلسازی کے خاتمے کے لیے ای اسٹیمپنگ سسٹم مؤثر انداز میں نافذ کیا جا رہا ہے، جس کے مثبت نتائج سامنے آنا شروع ہو گئے ہیں۔

نجی ٹی وی چینل ہم نیوز کی رپورٹ کے مطابق ضلعی انتظامیہ نے واضح کیا ہے کہ فیڈرل ٹریژری کی جانب سے روایتی اسٹامپ پیپرز کی مزید فراہمی روک دی گئی ہے۔ البتہ جو اسٹامپ پیپرز پہلے سے جاری ہو چکے ہیں، انہیں ان کی میعاد ختم ہونے تک قابلِ استعمال رکھا جائے گا۔ڈپٹی کمشنر اسلام آباد کے مطابق ای اسٹیمپنگ منصوبے کے تحت اب تک 585 چالان جاری کیے جا چکے ہیں۔ اس نظام کے نفاذ سے نہ صرف شفافیت میں اضافہ ہوا ہے بلکہ اسٹامپ پیپرز سے متعلق مکمل ڈیجیٹل ریکارڈ بھی محفوظ کیا جا رہا ہے۔ انہوں نے مزید بتایا کہ شہری اب پاکستان سٹیزن پورٹل کے ذریعے ای اسٹیمپ کی تصدیق باآسانی کر سکتے ہیں، جس سے جعلسازی کے خدشات میں نمایاں کمی آئے گی۔

انتظامیہ کا کہنا ہے کہ ای اسٹیمپنگ کے نفاذ سے سرکاری نظام میں سہولت اور اعتماد کو فروغ ملے گا، جبکہ عوام کو بھی زیادہ محفوظ اور تیز رفتار خدمات فراہم کی جا سکیں گی۔