اسلام آباد (نیوز ڈیسک) نئے سال کے آغاز پر عوام کے لیے خوشخبری متوقع ہے، کیونکہ پٹرولیم مصنوعات کی قیمتوں میں فی لیٹر 10 روپے 60 پیسے تک کمی کا امکان ظاہر کیا جا رہا ہے۔
نجی ٹی وی چینل کے مطابق پٹرولیم مصنوعات کی قیمتوں سے متعلق ابتدائی حساب کتاب مکمل کر لیا گیا ہے، جس کے تحت یکم جنوری سے قیمتوں میں نمایاں کمی کی تجاویز سامنے آئی ہیں۔
وزارتِ خزانہ کے ذرائع کے مطابق پٹرول کی قیمت میں 10 روپے 60 پیسے فی لیٹر کمی کی سفارش کی گئی ہے، جبکہ ہائی اسپیڈ ڈیزل کی قیمت میں 8 روپے 59 پیسے فی لیٹر کمی تجویز کی گئی ہے۔ اسی طرح مٹی کے تیل کی قیمت 9 روپے فی لیٹر اور لائٹ ڈیزل کی قیمت 6 روپے 62 پیسے فی لیٹر کم کیے جانے کا امکان ہے۔
ذرائع کا کہنا ہے کہ اوگرا اپنی حتمی ورکنگ حکومت کو ارسال کرے گی، جس کے بعد حکومت مالی ضروریات کو مدنظر رکھتے ہوئے فیصلہ کرے گی۔ قیمتوں میں رد و بدل کی منظوری وزیراعظم کی جانب سے دی جائے گی، جبکہ حتمی نوٹیفکیشن وزارتِ پٹرولیم جاری کرے گی۔
اگر حکومت نے اس موقع پر اضافی لیوی یا ٹیکس عائد نہ کیے تو نئے سال پر عوام کو پٹرولیم مصنوعات کی قیمتوں میں واضح ریلیف ملنے کا امکان ہے۔
