اسلا م آباد(نیوز ڈ یسک )محکمہ پاسپورٹ نے درخواست دہندگان کے لیے ایک نیا سہل نظام متعارف کر دیا ہے جس کے تحت شہری اب اپنے فنگر پرنٹس کی تصدیق باآسانی کر سکیں گے۔رپورٹس کے مطابق پاسپورٹ ڈائریکٹوریٹ نے آن لائن درخواست دینے والوں کی مشکلات کو مدنظر رکھتے ہوئے جدید بائیومیٹرک ویریفی کیشن سسٹم شروع کیا ہے۔ نادرا کے تعاون سے تیار کردہ اس نظام کے ذریعے صارفین پاک آئی ڈی ایپ استعمال کرتے ہوئے گھر بیٹھے فنگر پرنٹس کی تصدیق کر سکتے ہیں۔
محکمہ پاسپورٹ کا کہنا ہے کہ یہ سسٹم خصوصاً بیرون ملک رہنے والے پاکستانیوں کو درپیش ان مسائل کو حل کرنے کے لیے بنایا گیا ہے جن کا سامنا وہ آن لائن بائیومیٹرک ویریفی کیشن کے دوران کرتے تھے۔ اگر کسی وجہ سے فنگر پرنٹ ویریفی کیشن ممکن نہ ہو تو متبادل کے طور پر چہرے کی شناخت کا فیچر بھی شامل کیا گیا ہے، جس سے تصدیقی عمل بغیر رکاوٹ مکمل ہو سکے گا۔ڈی جی پاسپورٹ مصطفیٰ جمال قاضی نے بتایا کہ اوورسیز پاکستانیوں، بزرگ شہریوں اور خصوصی افراد کی شکایات کے بعد نادرا کے ساتھ مل کر یہ نیا نظام تیار کیا گیا ہے۔ ان کے مطابق شہریوں کو سہولت فراہم کرنے کے لیے جدیدیت کا عمل جاری ہے اور مستقبل میں اس سسٹم میں مزید بہتریاں بھی متوقع ہیں۔
