واشنگٹن(این این آئی)عالمی مالیاتی فنڈ (آئی ایم ایف)نے پاکستان کیلئے 1ارب 29کروڑ ڈالر کی منظوری دے دی۔پیر کو واشنگٹن میں آئی ایم ایف ایگزیکٹوبورڈ کا پاکستان سے متعلق اجلاس ہوا جس میں پاکستان کیلئے 1ارب 29کروڑ ڈالر کی قسط کی منظوری دی گئی۔ آئی ایم ایف مشن پہلے ہی اس قسط کے اجرا کی منظوری دے چکا تھا۔ 1ارب 29کروڑ ڈالر کی قسط میں سے 20کروڑ ڈالر موسمیاتی تبدیلی سے نمٹنے کیلئے منصوبوں کے لیے ملیں گے۔اس کے علاوہ آئی ایم ایف ایگزیکٹیو بورڈ نے دوسرے اقتصادی جائزے کی بھی منظوری دے دی۔
ذرائع کے مطابق 7ارب ڈالر کے ای ایف ایف پروگرام کی مد میں 1ارب ڈالر سے زائد ملیں گے، 1.3ارب ڈالر کے آر ایس ایف کے تحت 20کروڑ ڈالر سے زائد کی پہلی قسط شامل ہے۔ذرائع کے مطابق دونوں قرض پروگرامز کی مجموعی جاری رقم 3.3ارب ڈالر ہو جائے گی۔ذرائع کے مطابق پاکستان کو ای ایف ایف پروگرام کے تحت 2اقساط پہلے ہی مل چکی ہیں۔آئی ایم ایف نے جاری قرض پروگرام پر عمل درآمد کو مضبوط قرا دیا۔ حکومت نے بھی معاشی اصلاحات پر عمل درآمد جاری رکھنے کی یقین دہانی کرائی۔واضح رہے کہ 1ارب 29کروڑ ڈالر ملنے سے پاکستان کے زرمبادلہ ذخائر میں مزید اضافہ ہوگا۔
