اسلام آباد (نیوز ڈیسک) شہر میں سستی پروٹین کے ذرائع بھی مہنگائی کی لپیٹ میں آ گئے ہیں۔ برائلر گوشت کی قیمت میں 14 روپے فی کلو کا اضافہ ہونے کے بعد نیا ریٹ 446 روپے فی کلوگرام مقرر کیا گیا ہے۔
تفصیلات کے مطابق لاہور میں زندہ برائلر کا فارم ریٹ 280 روپے فی کلو، ہول سیل 294 روپے جبکہ پرچون سطح پر 308 روپے فی کلو تک فروخت جاری ہے۔
اسی طرح فارمی انڈوں کی قیمتوں میں بھی اضافہ ریکارڈ کیا گیا ہے، ایک درجن انڈوں کی قیمت بڑھ کر 335 روپے ہو گئی ہے جبکہ ایک پیٹی کی قیمت 9 ہزار 930 روپے تک پہنچ گئی ہے۔
دوسری جانب سرگودھا میں سرد موسم کے آغاز کے ساتھ ہی انڈوں کی قیمتوں میں غیر معمولی اضافہ دیکھا جا رہا ہے۔ صرف ایک ہفتے میں فی درجن انڈے 55 روپے مہنگے ہو گئے۔ قیمت 280 روپے سے بڑھ کر 335 روپے فی درجن تک جا پہنچی ہے۔

شہریوں کا کہنا ہے کہ مہنگائی نے عام آدمی کی زندگی مشکل بنا دی ہے، انڈے جیسی روزمرہ کی چیز بھی اب پہنچ سے باہر ہو گئی ہے۔ عوام نے ضلعی انتظامیہ سے مطالبہ کیا ہے کہ انڈوں اور مرغی کے گوشت کی قیمتوں کو قابو میں رکھنے کے لیے مؤثر اقدامات کیے جائیں۔