پشاور(این این آئی)ڈائریکٹر جنرل خیبرپختونخوا فوڈ سیفٹی اینڈ حلال فوڈ اتھارٹی واصف سعید کی نگرانی میں فوڈ سیفٹی ٹیموں نے ضلعی انتظامیہ کے ہمراہ گزشتہ روز تحصیل پبی، بانڈہ نبی، نوشہرہ میں جعلی برانڈڈ کولڈ ڈرنکس تیار کرنے والی فیکٹری پر کامیاب کارروائی کی۔ترجمان فوڈ اتھارٹی نے تفصیلات جاری کرتے ہوئے کہا کہ کارروائی کے دوران فیکٹری سے بڑی مقدار میں سیرپ برآمد کرکے موقع پر تلف کر دیا گیا۔
مزید براں، یونٹ سے 4 فلنگ مشینیں، 2 مکسنگ ٹینکس، 3 واٹر و مشروبات ٹینکس، 8 بیگز خالی بوتلیں اور 9 کین فلیورز و کیمیکلز بھی سرکاری تحویل میں لے لیے گئے۔ مزید تفصیلات کیمطابق فوڈ اتھارٹی ٹیم نے فیکٹری کو سیل کر دیا جبکہ مالکان کے خلاف ایف آئی آر درج کر کے مزید قانونی کارروائی کا آغاز کر دیا گیا ہے۔ڈائریکٹر جنرل واصف سعید نے کامیاب کارروائی پر فوڈ سیفٹی ٹیموں کو سراہا اور کہا کہ جعلی اور غیر معیاری کولڈ ڈرنکس تیار کرنے والوں سے کوئی رعایت نہیں برتی جائے گی۔ ایسے گھناؤنے کاروبار صوبے کے عوام کی صحت کے دشمن ہیں، جن کا مکمل خاتمہ کیا جائے گا۔
