کراچی(این این آئی)شہرقائد کے علاقے گلستانِ جوہر میں گھر میں کام کرنے والی ماسیاں 3 کروڑ کا سونا لوٹ کر فرارہوگئیں، ساتھیوں کی مدد ماں بیٹی کویرغمال بناکر لوٹ مار کی گئی۔تفصیلات کے مطابق کراچی کے علاقے گلستانِ جوہر کے بلاک 15 میں ڈکیتی کی سنگین واردات پیش آئی، جہاں گھر میں کام کرنے والی دو ماسیوں نے اپنے ساتھیوں کی مدد سے تقریبا تین کروڑ روپے مالیت کا سونا اور نقدی لوٹ کر فرار ہوگئیں۔

پولیس نے بتایا کہ تین مسلح ملزمان کام کرنے والی ماسیوں کے ساتھ گھر میں داخل ہوئے اور وہاں موجود ماں بیٹی کو تشدد کا نشانہ بنا کر باندھ دیا ، جس کے بعد ملزمان 79 تولہ سونا، ملکی و غیرملکی کرنسی لوٹنے کے بعد موقع سے فرار ہوگئے۔واقعے کے بعد گلستان جوہر پولیس نے شک کی بنیاد پر گھریلو ملازمہ کو حراست میں لے کر تفتیش شروع کر دی ہے۔پولیس حکام کے مطابق واردات کے تمام پہلوئوں سے تحقیقات کی جا رہی ہیں تاکہ ملزمان کو جلد از جلد گرفتار کیا جا سکے۔پولیس ذرائع کے مطابق واردات کی منصوبہ بندی اندرونی معلومات کی بنیاد پر کی گئی، جبکہ ابتدائی شواہد سے ظاہر ہوتا ہے کہ گھر میں کام کرنے والی ملازمہ واردات میں ملوث ہو سکتی ہے۔