بیجنگ (نیوز ڈیسک)چین نے ایران کی خودمختاری کی خلاف ورزی پر شدید ردعمل دیتے ہوئے واضح کیا ہے کہ وہ کسی بھی ایسے اقدام کی مخالفت کرتا ہے جو ایرانی خودمختاری کو پامال کرے۔ چینی وزارتِ خارجہ کے ترجمان، لین جیان، نے ایک بیان میں کہا کہ اسرائیل کی جانب سے ایران پر کیے گئے حملے کے ممکنہ سنگین نتائج پر چین کو شدید تشویش ہے۔
ترجمان نے کہا کہ خطے میں تناؤ میں اچانک اضافہ کسی بھی فریق کے مفاد میں نہیں ہے، اس لیے تمام متعلقہ ممالک کو چاہیے کہ وہ ذمہ داری کا مظاہرہ کرتے ہوئے خطے میں استحکام، امن اور سلامتی کے فروغ کے لیے سنجیدہ اقدامات کریں۔
انہوں نے مزید کہا کہ چین اس بحران کے حل میں ایک مثبت اور تعمیری کردار ادا کرنے کے لیے تیار ہے تاکہ موجودہ کشیدہ ماحول کو کم کیا جا سکے اور مشرق وسطیٰ میں استحکام بحال ہو۔
ادھر ترک وزارتِ خارجہ کی جانب سے بھی اسرائیل کے حالیہ حملے کی سخت الفاظ میں مذمت کی گئی ہے۔ ترک حکام نے کہا کہ ایسے اقدامات خطے کو مزید کشیدگی کی طرف لے جا سکتے ہیں، لہٰذا تمام فریقین کو تحمل اور دانشمندی سے کام لینا چاہیے۔
