لاہور ( این این آئی) لاہور ہائیکورٹ نے تحریک انصاف کے 123کارکنوں کی نظر بندی کے احکامات معطل کرکے فوری رہا کرنے کا حکم دے دیا ۔

ہائیکورٹ کے جسٹس انوار الحق نے پی ٹی آئی کے 123کارکنوں کی بازیابی کے لیے فرخ حبیب کی جانب سے دائر درخواست پر سماعت کی۔مذکورہ درخواست میں فیصل آباد سے 123کارکنوں کی نظر بندی کو ہائی کورٹ میں چیلنج کیاگیا تھا۔پی ٹی آئی کے رہنما فرخ حبیب کے وکیل بیرسٹر احمد پنسوتہ کی جانب سے دلائل دیئے گئے کہ 9مئی کے واقعات کے بعد فیصل آباد سے درجنوں افراد کو گرفتار کرکے نظر بند کیا گیا، آئی جی پنجاب نے گرفتاری کا میڈیا کے سامنے اعتراف کیا، گرفتاری اور نظر بندی بنیادی حقوق کی سنگین خلاف ورزی اور غیرقانونی ہے۔درخواست گزار کے وکیل نے استدعا کی کہ عدالت ڈپپٹی کمشنر فیصل آباد کے نظربندی کے احکامات کالعدم قرار دے۔جسٹس انوارالحق پنوں نے محفوظ فیصلہ سناتے ہوئے فیصل آباد سے تحریک انصاف کے رہنمائوں اور کارکنوں سمیت 123فراد کی نظربندی کے احکامات معطل کر دیئے ۔عدالت نے فریقین کو نوٹس جاری کرتے ہوئے جواب طلب کرلیا۔خیال رہے کہ تحریک انصاف کے چیئرمین عمران خان کی 9مئی کو گرفتاری کے بعد پنجاب سمیت ملک بھر میں مظاہروں کا سلسلہ شروع ہوگیا تھا، جس کے بعد حالات پر قابو پانے کیلئے نگراں پنجاب حکومت نے پی ٹی آئی کارکنوں کیخلاف کریک ڈائون کا آغاز کردیا تھا۔انتظامیہ نے فیصل آباد سے بھی پاکستان تحریک انصاف کے 100سے زائد کارکنوں کی نظر بندی کے احکامات جاری کئے، پولیس نے 123کارکنوں کو حراست میں لیا تھا۔

موضوعات:لاہور ہائیکورٹ