اسلام آباد(این این آئی)پاکستان تحریک انصاف کے چیئرمین عمران خان کے خلاف ایڈیشنل سیشن جج زیبا چوہدری کو دھمکانے پر توہین عدالت کیس کی سماعت کل اسلام آباد ہائیکورٹ میں ہو گی۔ توہین عدالت کیس کی سماعت چیف جسٹس اطہر من اللہ،

جسٹس محسن اختر کیانی، جسٹس میاں گل حسن اورنگ زیب، جسٹس طارق محمو د جہانگیری اور جسٹس بابر ستار پر مشتمل لارجر بینچ کرے گا۔عدالت نے عمران خان کو شوکاز نوٹس جاری کر کے ذاتی حیثیت میں طلب کر رکھا ہے۔رجسٹرار اسلام آباد ہائیکورٹ نے سماعت کیلئے ضابطہ اخلاق کا سرکلر جاری کیا ہے جس کے مطابق کورٹ روم نمبر ون میں داخلہ محدود ہو گا۔عمران خان کی لیگل ٹیم کے 15وکلا، ہائیکورٹ اور ڈسٹرکٹ بار کے پانچ پانچ وکلا، اٹارنی جنرل آفس اور ایڈوکیٹ جنرل آفس سے 15لا افسران اور 15 کورٹ رپورٹرز کو کورٹ روم میں داخلے کی اجازت ہو گی جنہیں پاسز جاری کیے گئے ہیں۔ سرکلر میں کہا گیا ہے کہ کورٹ ڈیکورم کو برقرار رکھنے کیلئے اسلام آباد انتظامیہ اور پولیس سکیورٹی انتظامات کرے۔