اسلام آباد /لاہور (ا ین این آئی) وزارت داخلہ نے قومی اسمبلی میں قائد حزب اختلاف و پاکستان مسلم لیگ (ن) کے صدر محمد شہباز شریف کا نام ایگزٹ کنٹرول لسٹ سے نکال دیا جس کے بعد شہباز شریف آئندہ چند روز میں لندن کے لئے روانہ ہوں گے اور اپنی پوتی اور بہو کی تیمار داری کریں گے ۔

ذرائع کے مطابق وزارت داخلہ نے لاہور ہائیکورٹ کے احکامات پر عملدرآمد کرتے ہوئے قائد حزب اختلاف شہباز شریف کا نام ای سی ایل سے نکال دیا اور اس ضمن میں صوبائی حکومتوں کو بھی باضابطہ طور پر آگاہ کر دیا ہے ۔محکمہ داخلہ کی جاب سے شہباز شریف کا نام ای سی ایل سے نکالنے کا نوٹیفکیشن بھی جاری کر دیا گیا ہے۔ ای سی ایل سے نام نکلنے کے بعد شہباز شریف کے بیرون ملک جانے کی راہ ہموار ہو گئی ہے ۔ذرائع کے مطابق شہباز شریف آئندہ چند روز میں لندن کے لیے روانہ ہوں گے جہاں وہ اپنی پوتی اور بہو کی تیمارداری کریں گے، اس کے علاوہ برطانیہ میں قیام کے دوران شہباز شریف صحت کے مسائل کے حوالے سے اپنے معالجین سے رابطہ بھی کریں گے۔واضح رہے کہ نیب نے شہباز شریف کا نام ای سی ایل میں شامل کرنے کی سفارش کی تھی جس کے بعد وزارت داخلہ نے سابق وزیراعلی پنجاب کا نام ایگزٹ کنٹرول لسٹ میں شامل کیا تھا، تاہم لاہور ہائیکورٹ نے شہباز شریف کا نام ای سی ایل سے نکالنے کا حکم دیا تھا۔

موضوعات:شہبازشریف