اسلام آباد (نیوز ڈیسک)اسپین کے معروف پیسٹری شیف مارک سواریز نے سعودی شاہی خاندان کی ایک شادی کے لیے غیر معمولی اور شاندار کیک تیار کیا ہے،
جس کی اونچائی 3.5 میٹر، چوڑائی 1.8 میٹر جبکہ وزن تقریباً 500 کلوگرام ہے۔رپورٹس کے مطابق اس دیوہیکل کیک کا ابتدائی ڈیزائن اور تصور تیار کرنے میں شیف کو تقریباً ڈیڑھ ماہ کا وقت لگا، جبکہ اسے مکمل شکل دینے کے لیے مزید چار ماہ درکار ہوئے۔ عام طور پر تنہا کام کرنے والے مارک سواریز نے اس بڑے منصوبے کو مکمل کرنے کے لیے اپنے پیسٹری شیف دوستوں اور ان کے اہل خانہ کی مدد بھی حاصل کی۔کیک کی تیاری میں سب سے زیادہ محنت 33 ہزار پھولوں کی پتیوں کو تیار کرنے، مختلف رنگ دینے اور انہیں شاخوں و پھولوں کے ساتھ خوبصورتی سے سجانے پر صرف ہوئی۔
اس مرحلے میں شیف کے دوستوں، خاندان اور دیگر قریبی افراد نے بھی بھرپور تعاون کیا۔مارک سواریز کے مطابق اس منفرد فن پارے کی تیاری میں مجموعی طور پر تقریباً 1800 گھنٹے صرف ہوئے۔ کیک کو اس انداز میں ڈیزائن کیا گیا ہے کہ یہ روایتی شادی کے کیک کے بجائے کسی شاندار آرٹ پیس یا میوزیم میں رکھے جانے والے فن پارے کی منظرکشی کرتا ہے۔یہ غیر معمولی کیک پیرس کے اوپرا گارنیئر میں منعقد ہونے والی ایک سعودی جوڑے کی شادی کے موقع پر پیش کیا گیا۔ تاہم دلہا اور دلہن نے اپنی شناخت ظاہر نہ کرنے کی خواہش کا اظہار کیا۔
