کراچی(این این آئی)ملک میں موبائل فون صارفین کے لیے کال اور انٹرنیٹ سروسز مزید مہنگی ہو گئی ہیں۔

پاکستان ٹیلی کمیونی کیشن اتھارٹی (پی ٹی اے) نے مختلف ٹیلی کام کمپنیوں کے ہائبرڈ اور ڈیٹا اونلی پیکیجز کی نئی قیمتوں کی تفصیلات جاری کر دی ہیں، جن کے تحت بعض پیکجز کی قیمتوں میں 33 فیصد تک اضافہ کیا گیا ہے۔پی ٹی اے کے مطابق مجموعی طور پر 15 ہائبرڈ اور ڈیٹا اونلی پیکیجز کی نئی ٹیرف فہرست جاری کی گئی ہے، جس میں مختلف مدت اور سہولتوں کے حامل پیکیجز کی قیمتوں میں اضافہ شامل ہے۔جاری کردہ تفصیلات کے مطابق ماہانہ کال اور ڈیٹا پیکیجز کی قیمتوں میں 500 روپے تک اضافہ کیا گیا ہے، جبکہ 15 روزہ ہائبرڈ پیکیجز کی قیمتوں میں 300 روپے تک اضافہ کیا گیا ہے۔اسی طرح ہفتہ وار ہائبرڈ پیکیجز کی قیمتوں میں 130 روپے تک اضافہ کیا گیا ہے، جبکہ تین روزہ موبائل پیکیجز کی قیمتوں میں 21 روپے اور دو روزہ پیکیجز میں 20 روپے تک اضافہ کیا گیا ہے۔ علاوہ ازیں ایک روزہ ہائبرڈ پیکیجز بھی 5 روپے مہنگے کر دیے گئے ہیں۔

پی ٹی اے نے کہا کہ تمام ہائبرڈ اور ڈیٹا اونلی پیکیجز کی نئی قیمتیں، سہ ماہی ٹیرف، مدت اور فراہم کی جانے والی سہولتوں کی مکمل تفصیلات اتھارٹی کی ویب سائٹ پر جاری کر دی گئی ہیں۔اتھارٹی کے مطابق اس اقدام کا مقصد صارفین کو مختلف موبائل کمپنیوں کے پیکیجز کا تقابلی جائزہ لینے میں سہولت فراہم کرنا ہے تاکہ وہ اپنی ضرورت اور بجٹ کے مطابق مناسب پیکیج کا انتخاب کر سکیں۔پی ٹی اے نے اپنے بیان میں کہا کہ ٹیلی کام شعبے میں شفافیت کو فروغ دینا اور صارفین کے مفادات کا تحفظ اتھارٹی کی اولین ترجیحات میں شامل ہے، اسی لیے تمام منظور شدہ ٹیرف عوام کے لیے دستیاب کر دیے گئے ہیں۔