اسلام آباد(مانیٹرنگ ڈیسک)سیاستدانوں کی بڑی مشکل حل،الیکشن مہم، جلسے، جلوس، ریلیوں، نعروں، دنگا فساد کیلئے بند کرائے پر حاصل کریں، سوشل میڈیا پر جاری اشتہار میں سیاسی جماعتوں کو کھلی آفر دیدی گئی۔ مقامی اخبار کی رپورٹ کے مطابق ملک میں عام انتخابات کے قریب آتے ہی حلقوں میں سیاسی سرگرمیوںکا آغاز ہو چکا ہے، بڑی سیاسی جماعتوں نے بھی اپنی انتخابی کمپین شروع کر دی ہے
جبکہ سیاسی جماعتوں اور سیاستدانوں کی طرف سے اپنے جلسے جلوسوں اور ریلیوں کو کامیاب بنانے کیلئے بھی تمام حربے استعمال کئے جا رہے ہیں تاہم اب سوشل میڈیا پر وائرل ہونے والے ایک اشتہار نے سیاستدانوں کی مشکل آسان کر دی ہے۔ یہ اشتہار جلسے جلوسوں او رریلیوں کو کامیاب بنانے اور دنگا فساد کیلئے بندے کرائے پر دینے کا ہے جو سوشل میڈیا پر تیزی سے وائرل ہو رہا ہے۔ صارفین کی طرف سے اس اشتہار کو بڑی تعداد میں شیئر کرتے ہوئے اس پر دلچسپ تبصرے کئے جا رہے ہیں۔ ایک فیس بک صارف نے اشتہار شیئر کرتے ہوئے لکھا ہے کہ پیپلزپارٹی کی قیادت پنجاب میں جلسے جلوسوں کیلئے اشتہار پر دئیے گئے نمبر پر رابطہ کرے۔ ایک اور صارف نے لکھا کہ انتخابات کے دوران بندے کرائے پر دینا ایک زبردست بزنس ہے، حیرت ہے یہ آئیدیا مجھے کیوں نہیں آیا۔واضح رہے کہ اس وقت ملک بھر میں انتخابی مہم عروج پر پہنچ چکی ہے اور پاکستان کی بڑی سیاسی جماعتوں کی طرف سے انتخابی امیدواروں کو فائنل کرنے کے بعد انتخابی جلسوں کا بھی اعلان کر دیا گیا ہے۔ تمام امیدواروں اور پارٹیوں کی کوشش ہے کہ وہ اپنے انتخابی جلسوں اور کارنرمیٹنگز میں لوگوں کی کثیر تعداد کو لانے اور انہیں متوجہ کرنے میں کامیاب ہو جائیں جبکہ دوسری جانب عوام کی جانب سے اپنے حلقوں میں انتخابی مہم چلاتے امیدواروں پر غصے کا بھی اظہار سامنے آرہے ہیں اور عوامی غیض و غضب کا شمار بننے والے سیاستدانوں میں کئی نامور سیاستدان بھی شامل ہیں۔
