کراچی (این این آئی) ہینلے پاسپورٹ انڈیکس 2026 کے مطابق پاکستانی پاسپورٹ کی عالمی درجہ بندی میں بہتری آئی ہے اور یہ دو درجے ترقی کرتے ہوئے 103ویں سے 101ویں نمبر پر آ گیا ہے۔

تازہ درجہ بندی کے مطابق پاکستانی پاسپورٹ رکھنے والے افراد اب 29 ممالک اور خطوں میں بغیر پیشگی ویزا یا ویزا آن ارائیول کی سہولت کے ساتھ سفر کر سکتے ہیں، جو گزشتہ درجہ بندی کے مقابلے میں محدود مگر مثبت پیش رفت قرار دی جا رہی ہے۔ہینلے اینڈ پارٹنرز کی جانب سے جاری کردہ انڈیکس میں دنیا کے 199 پاسپورٹس اور 227 سفری مقامات کا جائزہ لیا گیا ہے۔ انڈیکس میں پاسپورٹ کی طاقت کا تعین اس بنیاد پر کیا جاتا ہے کہ اس کے حامل افراد کتنے ممالک میں بغیر پیشگی ویزا داخل ہو سکتے ہیں۔رپورٹ کے مطابق اگرچہ پاکستان کی عالمی درجہ بندی میں بہتری آئی ہے، تاہم پاکستانی پاسپورٹ اب بھی عالمی سطح پر نسبتاً کمزور پاسپورٹس میں شمار ہوتا ہے۔

خطے کے دیگر ممالک میں بھارت 81ویں، بنگلہ دیش 97ویں اور نیپال 98ویں نمبر پر موجود ہیں، جبکہ پاکستان 101ویں نمبر پر ہے۔ہینلے پاسپورٹ انڈیکس کے مطابق عالمی درجہ بندی میں سنگاپور بدستور پہلے نمبر پر برقرار ہے، جبکہ جاپان دوسرے نمبر پر ہے۔ انڈیکس بین الاقوامی فضائی نقل و حمل کی تنظیم (آئی اے ٹی اے) کے سفری ڈیٹا کی بنیاد پر مرتب کیا جاتا ہے اور اسے پاسپورٹس کی عالمی حیثیت جانچنے کا ایک معتبر پیمانہ تصور کیا جاتا ہے۔