مکوآنہ (این این آئی)محکمہ ایکسائز اینڈ ٹیکسیشن نے30 ستمبر تک پراپرٹی ٹیکس کی ادائیگی پر 10 فیصد رعایت کا اعلان کیاہے۔اسسٹنٹ ایکسائز اینڈ ٹیکسیشن آفیسرمحکمہ ایکسائز اینڈ ٹیکسیشن ونارکاٹکس کنٹرول فیصل آباد شفقت قریشی نے ایک ملاقات کے دوران بتایا کہ جو پراپرٹی مالکان30ستمبر تک اپنے واجب الادا پراپرٹی ٹیکس ادا کریں گے انہیں 5 فیصد رعایت دی جائے گی جبکہ جو پراپرٹی مالکان 30 ستمبر تک بذریعہ ای پے اپنے سرکاری واجبات جمع کروائیں گے انہیں مزید 5 فیصد رعایت سمیت کل 10 فیصد رعایت فراہم کی جائے گی۔

انہوں نے کہا کہ مقررہ تاریخ کے بعد نہ صرف پوراپراپرٹی ٹیکس وصول کیا جا ئے گا بلکہ نادہندگان کو جرمانوں سمیت ان کی پراپرٹیز کو سربمہر کرنے سے بھی گریز نہیں کیا جا ئے گا۔انہوں نے کہا کہ اس ضمن میں مزید معلومات و رہنمائی کیلئے محکمہ ایکسائز کی پراپرٹی ٹیکس برانچ سے رابطہ کیا جاسکتا ہے۔