جہلم(آن لائن):جمعیت علمائے اسلام کے مرکزی ترجمان اور سابق سینیٹرحافظ حسین احمد نے کہا ہے کہ عمران خان نیازی جے یو آئی سے این آر او کے لیے قومی اور بین الاقوامی اسٹیبلشمنٹ سے تعاون کی بھیک مانگ رہے ہیں مگر انہیں کسی صورت این آر او نہیں ملے گا اس بار امپائر کی انگلی کے بجائے ”کاکڑ فارمولا“ استعمال ہوسکتا ہے، اکتوبر میں اسلام آباد اور پنڈی کا موسم ہی نہیں بلکہ موسمی تبدیلی کے ساتھ تبدیلی کے نعرے والے بھی تبدیل ہونگے،
مشیر اطلاعات سستی شہرت کے لیے عمران نیازی کے موقف کے خلاف بیانات دے رہی ہیں۔حافظ حسین احمد نے مزید کہا کہ کل اپوزیشن کو این آر او نہ دینے کے دعویدار خود اپنے این آر او کے لیے دردر کی خاک چھان رہے ہیں اور جے یو آئی سے این آر اوکے لیے قومی اور بین الاقومی اسٹیبلشمنٹ سے تعاون کی بھیک مانگ رہے ہیں مگر اس حوالے سے ان کی دال نہیں گلے گی ان کو کسی صورت این آر او نہیں ملے گا، انہوں نے کہا کہ اس بار امپائر کی انگلی کے بجائے ”کاکڑ فارمولا“ استعمال ہوسکتا ہے، انہوں نے کہا کہ حکومت کے آستین میں پلنے والے سانپ اور سنپولے بھی وزیر اعظم بننے کے خواب دیکھ رہے ہیں بلکہ شاہ محمود قریشی اور فواد چوہدری اپنی اس خواہش کو چھپا بھی نہیں سکے، مشیر اطلاعات فردوس عاشق اعوان کے بیان پر تبصرہ کرتے ہوئے حافظ حسین احمد کاکہنا تھا کہ مشیر اطلاعات نے ہمیں کشمیر کی طرف مارچ کا مشورہ دیا ہے جبکہ عمران خان نیازی پاکستان سے کشمیریوں کی حمایت کے لیے جانے والے پاکستانیوں کو ظالم قرار دے چکے ہیں عمران نیازی مودی کی زبان بول رہے ہیں اور مشیر اطلاعات سستی شہرت کے لیے عمران خان نیازی کے موقف کے خلاف بیانات دے رہی ہیں انہیں پہلیعمران نیازی کے بیان کی مذمت کرنا چاہئے بعد میں وہ کشمیریوں کے حمایت اور تعاون کے لیے پاکستانیوں کو کشمیر کی طرف مارچ اور حمایت کرنے کی ہدایت دیں، انہوں نے ایک سوال کے جواب میں کہا کہ دعاگو ہے کہ پیپلز پارٹی آصف زرداری اور مسلم لیگ(ن) نوازشریف کے فیصلوں اور خواہشات کا احترام کرتے ہوئے آزادی مارچ میں جے یو آئی کے شانہ بشانہ نظر آئیں، انہوں نے کہا کہ اکتوبر میں اسلام آباد اور پنڈی کا موسم ہی نہیں بلکہ موسمی تبدیلی کے ساتھ تبدیلی والے بھی تبدیل ہونگے۔
