اسلام آباد(این این آئی) پاکستان سے بیرون ملک جانیوالے مسافروں کو بورڈنگ پاس کسٹمز اور کرنسی ڈیکلریشن کے بغیر نہ دینے کی نئی شرط لاگو کردی گئی۔ تفصیلات کے مطابق منی لانڈرنگ روکنے سے متعلق فیٹف کی ہدایت پر عملدرآمد کے معاملے پر پاکستان میں کسٹمز اور کرنسی ڈیکلریشن کی فیٹف کی سخت ہدایات پر عمل درآمد شروع کردیا گیا۔سی اے اے نے تمام ایرلاینز کو نئی ہدایات جاری کردی ہے
، جس میں پاکستان سے بیرون ملک جانیوالے مسافروں کو بورڈنگ پاس کسٹمز اور کرنسی ڈیکلریشن کے بغیر نہ دینے کی نئی شرط لاگو کردی گئی ہے۔فیٹف ایڈوائزری کے تحت پاکستان سے بیرون ملک جانیوالے مسافروں کو ٹکٹس بکنگ کے وقت کسٹمز اور کرنسی ڈیکلریشن کی شرط رکھی گئی ہے جس پر سی اے اے نے تمام ایرلائنز کے بیرون ملک سفر کرنیوالے مسافروں کیلئے کسٹم ڈیکلریشن اور کرنسی ڈیکلریشن لازمی قرار دے دی ہے۔سی اے اے نے بیرون ملک سے پاکستان آنے اور جانے والی پروازوں سے متعلق بھی پالیسی متعین کردی ہے۔بیرون ملک سے پاکستان آنے والی فلائٹ کے دوران فضائی میزبان مسافروں کو کرنسی و کسٹم ڈیکلریشن فارم پر کرنے کا اعلان کریں گے۔سی اے اے کے مطابق پاکستان کے ایئرپورٹس پر اترتے وقت کسٹمز انٹرنیشنل ارایل کانٹر پر کرنسی اور کسٹم ڈیکلریشن کی تفصیل امیگریشن سے قبل کسٹمز حکام کو فراہم کرنا ہوں گی۔پاکستان سے بیرون ملک جانیوالی پروازوں کے مسافروں کو ٹکٹ بکنگ کے وقت کسٹمز اور کرنسی ڈیکلریشن کی شرط لازمی قرار دی گئی ہے ۔پاکستان کسٹمز کو تمام انٹرنیشنل ایئرپورٹس پر عملہ متعین کرنے کی ہدایت کرتے ہوئے کہا کہ مسافروں کو کسٹمز اور ایئرلاینز کا عملہ معاونت فراہم کرے گا۔فیٹف گائڈ لائن پر عمل درآمد کے لیے سی اے اے پاکستان کسٹمز اور ایئرلائنز کی مکمل مدد فراہم کرے۔
