اسلام آباد، کراچی ( آن لائن، این این آئی ) راول ڈیم میں پانی کی سطح بلند ہونے کے بعد سپل ویز کھول دیئے گئے،راول ڈیم انتظامیہ کے مطابق ڈیم میں اس وقت پانی کی سطح 1752فٹ سے زائد ہے،اسپل ویز کھولنے کے بعد پانی کی سطح 1749 فٹ پرلاکرسپل ویز بند کیے جائیں گے

کیونکہ سپل ویز کھولنے کے باعث قریبی نہروں میں سیلابی صورتحال رہ سکتی ہے۔انتظامیہ نے کہا کہ عوام کو نہروں میں ڈبکیاں لگانے سے گریز کرنے کی ہدایت بھی جاری کی گئی ہے۔دوسری جانب کراچی اور بلوچستان کے علاقوں کو پانی فراہم کرنے والے بلوچستان کے حب ڈیم میں پانی کی سطح مکمل بھر جانے کے نمبر 339 فٹ سے بھی ساڑھے تین فٹ بلند ہوگئی۔حب ڈیم کے اسپل ویز سے پیر کو پانی کا انتہائی غیر معمولی اخراج ریکارڈ کیا گیا جس سے حب ندی میں سیلابی صورتحال پیدا ہوئی اور انتظامیہ نے علاقے میں ہنگامی صورتحال نافذ کردی۔واپڈا ذرائع کے مطابق پیر کی رات حب ڈیم میں سطح آب 342 سے 343 فٹ کے درمیان تھی، یہی وجہ ہے کہ اسپل ویز سے پانی کافی تیزی سے خارج ہو رہا ہے اور ندی میں سیلابی صورتحال ہے، حب ندی کے اطراف کی آبادیوں سے لوگوں کا انخلا کرنا پڑا۔ علاقہ مکینوں کے مطابق حب ندی میں پانی کا بہاؤ بہت تیز رہا، حب ڈیم سے اوور فلو ہونے والا پانی بند مراد کے مقام پر کراچی کیلئے بنی نئی سڑک کے پل کی گنجائش سے زائد تھا، یہ زائد پانی پل سے اوور فلو ہوکر سڑک کو کاٹتے ہوئے پھر ندی میں گر رہا تھا۔ علاقہ مکینوں کے مطابق رات گئے اس پانی میں مسلسل اضافہ ہورہا تھا اور آخری وقت تک حب ندی میں اونچے درجے کے سیلاب ہے۔