اسلام آباد (نیوز ڈ یسک)ذرا ایک ایسے اسمارٹ فون کا تصور کریں جسے بار بار چارج کرنے کی جھنجھٹ ہی نہ ہو اور جو تقریباً پورا ہفتہ ایک ہی چارج پر چلتا رہے۔یہ خیال اب حقیقت بن چکا ہے۔

جرمنی کی ایک ٹیکنالوجی کمپنی پونکیٹ نے ایک نیا اسمارٹ فون ایم سی 03 متعارف کرایا ہے جو غیر معمولی بیٹری ٹائمنگ کی وجہ سے توجہ کا مرکز بن گیا ہے۔ عام اسمارٹ فونز جہاں ایک یا زیادہ سے زیادہ دو دن میں دوبارہ چارج مانگ لیتے ہیں، وہیں یہ فون ایک ہی چارج پر 6 سے 7 دن تک استعمال کیا جا سکتا ہے۔کمپنی کے مطابق اس شاندار بیٹری بیک اپ کی بنیادی وجہ فون کا سافٹ ویئر ڈیزائن ہے۔ عام فونز میں متعدد ایپس پس منظر میں چلتی رہتی ہیں جو مسلسل ڈیٹا اور توانائی استعمال کرتی ہیں، جبکہ ایم سی 03 میں صارف کو مکمل اختیار دیا گیا ہے کہ وہ ایپس کے ڈیٹا تک رسائی کو خود کنٹرول کرے۔ فون میں پہلے سے ہی ایپس کو انٹرنیٹ تک رسائی محدود رکھی گئی ہے، جس کے باعث بیک گراؤنڈ میں غیر ضروری ڈیٹا اور پاور کا استعمال نہیں ہو پاتا۔پونکیٹ کا کہنا ہے کہ شدید استعمال کی صورت میں بھی یہ فون 4 سے 5 دن تک چلتا ہے، جبکہ عام استعمال میں ایک ہفتے تک چارج کی ضرورت پیش نہیں آتی۔ دلچسپ بات یہ ہے کہ اس طویل بیٹری لائف کے لیے فون میں کوئی غیر معمولی بڑی بیٹری نہیں لگائی گئی، بلکہ اس کا بیٹری سائز دیگر اسمارٹ فونز جیسا ہی ہے۔

یہ ڈیوائس اوپن سورس اینڈرائیڈ پر مبنی AphyOS آپریٹنگ سسٹم پر کام کرتی ہے، جس میں صارف کی پرائیویسی کو خاص اہمیت دی گئی ہے۔ فون میں 120 ہرٹز کا جدید OLED ڈسپلے شامل ہے، جبکہ بیٹری کو آسانی سے نکال کر تبدیل بھی کیا جا سکتا ہے۔ کیمرہ سیٹ اپ کی بات کی جائے تو اس کے پچھلے حصے پر تین کیمرے نصب ہیں۔کمپنی نے اعلان کیا ہے کہ ایم سی 03 جلد یورپی مارکیٹ میں تقریباً 700 ڈالر کی قیمت پر دستیاب ہوگا۔