لاہور ( این این آئی) چیئرمین پاکستان تحریک انصاف عمران خان کی مشکلات کم نہ ہو سکیں، سیشن کورٹ میں سابق وزیراعظم کے خلاف ایک اور مقدمہ کے اندراج کی درخواست دائر کر دی گئی۔
چیئرمین پی ٹی آئی عمران خان کے خلاف درخواست سابق سپرنٹنڈنٹ کاشانہ افشاں لطیف کی جانب سے دائر کی گئی ہے۔درخواست میں موقف اختیار کیا گیا ہے کہ عمران خان کے بطور ریاست کے سربراہ ہونے کی حیثیت سے لاوارث اور یتیم بچیاں انکی امانت تھیں، عمران خان نے لاوارث اور یتیم بچیوں کے فنڈز اور بجٹ روکنے پر کوئی ایکشن نہیں لیا۔درخواست گزار کی جانب سے کہا گیا ہے کہ عمران خان نے یتیم اور لاوارث بچیوں کا بجٹ اور فنڈز روکے، عمران خان کے خلاف مقدمہ درج کرانے کے لئے متعدد بار رجوع کیا۔درخواست گزار نے استدعا کی ہے کہ عدالت عمران خان کے خلاف کریمنل مقدمہ درج کرنے کا حکم دے۔
