کراچی(این این آئی)جمعیت اہلحدیث پاکستان کے اجلاس چیف آرگنائزر مولانا محمد یوسف سلفی کی زیر صدارت منعقد ہواجس میں فرانس کی عمارتوں پرگستاخانہ خاکوں کی اشتہارات کی تنصیب اور فرانس کے صد ر کی جانب سے حضرت محمد مصطفی صلی اللہ علیہ وآلہ وسلم کی

شان میں گستاخی کرنے کے بیان پر تشویش کا اظہار کرتے ہوئے ان واقعات کی سخت الفاظ میں مذمت کی گئی ۔ اجلاس سے مولانا محمد یوسف سلفی نے خطاب کرتے ہوئے کہا کہ یہود وہنود ایک مرتبہ پھر رسول اللہ صلی اللہ علیہ وآلہ وسلم کی شان میں گستاخی کر کے عالم اسلام کو للکار رہے ہیں لہذا امت مسلمہ بالخصوص اسلامی ممالک کے سربراہان مملکت عالم اسلام سے یکجہتی کا مظاہرہ کرتے ہوئے فرانس کاسرکاری بائیکاٹ اور ان کی مصنوعات کے لئے کئے گئے تجارتی معاہدوں کو فوری طور پر ختم کرنے کا اعلان کریں۔ انہوں نے کہا اللہ کے رسول صلی اللہ علیہ وآلہ وسلم کی ذات دنیا بھر کے انسانوں کے لئے ایک مثالی نمونہ ہے ، آ پ صلی اللہ علیہ وآلہ وسلم کی شان میں گستاخی کرنے والوں کو ایک بار پھر منہ کی کھانی پڑے گی اور انہیں نشان عبرت بنادیا جائے گا ۔ اجلاس میں ایک قرارداد کے ذریعے دنیا بھر میں موجود تمام اسلامی تحریکوں و مذہبی جماعتوں سے یہ مطالبہ کیاگیا کہ وہ مشترکہ طور پر فرانسیسی مصنوعات کا بائیکاٹ کریں ،قرارداد میں حکومت پاکستان و تمام اسلامی ممالک کی حکومتوں سے مطالبہ کیا گیا کہ وہ فوری طور پر فرانس کے سفیروں کو ملک بدر کریں ۔ اس موقع پر مولانا بلال احمد سلفی، مولانا عبد الرحمن محمدی ، مولانا ثناء اللہ سلفی،اہلحدیث یوتھ فورس کے ناظم حافظ محمد حنیف سلفی اور زاہد علی، جمعیت طلباء اہلحدیث کے ناظم محمد جمیل یزدانی، رضوان خان نے بھی خطاب کیا۔