کراچی(این این آئی)شہر قائد کے علاقے کلفٹن سے مبینہ طور پر آبرو ریزی کا نشانہ بننے والی لڑکی کے کیس کی تحقیقات میں اہم پیشرفت ہوئی ہے۔رپورٹ کے مطابق کراچی کے علاقے کلفٹن میں لڑکی کے مبینہ طور پر آبرو ریزی کیس کی تحقیقات میں نیا موڑ آگیا، پولیس حکام کے مطابق مقدمہ درج ہونے کے بعد بھی لڑکی اور ملزم کے درمیان فون پر رابطے کا انکشاف ہوا ہے۔پولیس کے مطابق میڈیکل
رپورٹ میں لڑکی سےآبرو ریزی کی تصدیق نہیں کی گئی۔تفتیشی ذرائع کے مطابق منظر عام پر آنے والی سی سی ٹی وی فوٹیج میں دیکھا گیا ہے کہ مبینہ اغوا کاروں کے ساتھ لڑکی نے مزاحمت نہیں کی اور ملزمان کے ساتھ گفتگو کرتے ہوئے نظر آئی۔پولیس کے مطابق ایسا لگتا ہے کہ ملزمان اور لڑکی کے درمیان واقفیت تھی جبکہ مرکزی ملزم جیکب آباد سے تعلق رکھنے والے مرحوم پارلیمینٹیرین کا بیٹا ہے۔
