اسلام آباد(مانیٹرنگ ڈیسک)ملک بھر میں شدید سردی، بہتی آبشاریں جم گئیں، اسکردو سرد ترین مقام ، درجہ حرارت منفی 14ڈگری سینٹی گریڈ تک گر گیا، وفاقی دارالحکومت کا درجہ حرارت منفی ایک سینٹی گریڈ ، پشاور اور لاہور میں درجہ حرارت نقطہ انجماد کو چھو گیا۔ تفصیلات کے مطابق ملک بھر میں سردی کی شدید لہر کے باعث بہتی آبشاریں جم گئی ہیں۔ میڈیا رپورٹس کے

مطابق چوبیس گھنٹے کے دوران سرد ترین مقام اسکردو رہا جہاں درجہ حرارت منفی 14ڈگری سینٹی تک گر گیا، اسلام آباد میں منفی ایک ڈگری سینٹی گریڈ،پشاور اور لاہور میں درجہ حرارت نقطہ انجماد کو چھو گیا، مظفر آباد میں بھی درجہ حرارت منفی ایک ڈگری تک جا پہنچا۔استور میں کم سے کم درجہ حرارت منفی 10، گوپس میں منفی 8، کالام، گلگت، کوئٹہ، قلات اور دیر میں منفی 7، بگروٹ، راولا کوٹ میں منفی 5اور مری میں منفی 4ڈگری سینٹی گریڈ ریکارڈ کیا گیا۔کراچی میں کم سے کم درجہ حرارت 12، فیصل آباد میں 2، ملتان میں 3 اور حیدر آباد میں کم سے کم درجہ حرارت 10ڈگری سینٹی گریڈ ریکارڈ کیا گیا۔محکمہ موسمیات نے اتوار تک اسلام آباد، راولپنڈی، مالاکنڈ ڈویژن، گلگت بلتستان اور کشمیر میں کہیں کہیں بارش ہونے کا امکان ظاہر کیا ہے۔فیصل آباد، پشاور، لاہور، سرگودھا، بنوں، مردان اور ڈیرہ اسماعیل خان میں چند مقامات پر بارش اور پہاڑوں پر برف باری کی پیش گوئی کی گئی ہے۔منگل اور بدھ کے دوران کوئٹہ، ژوب، کوہاٹ، مالاکنڈ، ہزارہ ڈویژن، گلگت بلتستان اور کشمیر میں کہیں کہیں بارش اور پہاڑوں پر برف باری ہوسکتی ہے۔ادھر پنجاب کے میدانی علاقے اور پشاور ڈویژن آج بھی گہری دھند کی لپیٹ میں ہیں، دھند کی وجہ سے پشاور سے رشکئی تک موٹر وے بند کردیا گیا ہے۔گلگت بلتستان کے ضلع استور میں سردی کی شدت بڑھنے کے باعث واٹر چینل اور بہتی آبشاریں جم گئیں۔