لاہور ( این این آئی) حکومت پنجاب نے قبضہ مافیا سے واپس لی گئی ایک لاکھ کنال سے زائد سرکاری زمین پر پارکس ور ہاؤسنگ سکیمیں بنانے کا فیصلہ کر لیا ۔ذرائع کے حوالے سے بتایا گیا ہے کہ حکومت پنجاب نے قبضہ مافیا سے ایک لاکھ کنال سے زائد سرکاری زمین واگزار کروائی ہے جس کی مجموعی مالیت 143ارب روپے کے قریب ہے ۔
واگزار کروائی گئی سرکاری زمین پر عوام الناس کے لئے لو انکم ہاؤسنگ سکیمیں بنانے کے علاوہ تفریحی مقامات بنانے کی غرض سے ڈویژنل کمشنرز اور ڈپٹی کمشنرز سے سفارشات طلب کی گئی ہیں ۔ کمشنر اور ڈپٹی کمشنرز کو یہ بھی ہدایات جاری کی گئی ہیں کہ واگزار کروائی گئی سرکاری زمینوں کی موثر نگرانی کا عمل راؤنڈ دی کلاک جاری رکھیں۔
