لاہور(آ ئی این پی)تبلیغی جماعت کے امیر عبد الوہاب کا نمازجنازہ ادا کردیا گیا جس میں عوام کی بڑی تعداد نے شرکت کی،تفصیلات کے مطابق تبلیغی جماعت کے امیر حاجی عبد الوہاب اتوار کی صبح طویل علالت کے بعد 95 برس کی عمر میں انتقال کرگئے،مرحوم کا نماز جنازہ تبلیغی جماعت کے مرکز رائیونڈ میں بعد نمازِ مغرب ادا کیا گیا، جنازہ گاہ کو 2 حصوں میں تقسیم کیا گیا تھا

جس میں سے ایک کو وی آئی پی اور جماعت کے مرکزی عہدیداران جبکہ دوسرے حصے کو مختلف شہروں سے آنے والے افراد کے لیے مختص کیا گیا،جنازے میں شرکت کے لیے عوام کا ہجوم امڈ آیا تھا جس کے باعث لاہور کی مختلف شاہراوں پر شدید ٹریفک جام بھی ہوا۔ نماز جنازہ میں سپیکر پنجاب اسمبلی چوہدری پرویز الٰہی سمیت دیگر سیا ست دا نو ں نے بھی شر کت کی،حاجی عبدالوہاب نے اپنی زندگی کے کم و بیش 70سال دین کی تبلیغ میں گزارے،یاد رہے کہ حاجی عبد الوہاب نجی اسپتال میں زیر علاج تھے وہ طویل عرصے سے علالت کی زندگی بسر کررہے تھے۔ وزیر اعظم پاکستان، چیف جسٹس آف پاکستان نے ان کے انتقال پر افسوس کا اظہار کیا اور اہل خانہ سے تعزیت کی۔مولانا حاجی عبدالوہاب یکم جنوری 1923 کونئی دہلی میں پیدا ہوئے، مولاناعبدالوہاب نے اسلامیہ کالج لاہور سے گریجویشن کیا۔تقسیم ہند سے پہلے مولانا عبدالوہاب نے بطور تحصیل دار فرائض انجام دیے، مولانا عبدالوہاب تحصیل دارکاعہدہ چھوڑکرتبلیغی سرگرمیوں میں مصروف ہوئے۔قیام پاکستان کے بعد مولانا عبدالوہاب نے اہل خانہ کے ہمراہ بھارت سے ہجرت کی۔اس سے قبل تبلیغی جماعت کے امیر مولانا حاجی عبدالوہاب کی نماز جنازہ میں شرکت کے لیے جانے والے خواہشمندوں کی بڑی تعداد جناح انٹرنیشنل ایئرپورٹ کرا چی پہنچ گئی جب کہ مسافروں نے کرائے میں اضافی کی بھی شکایت کی ،قومی ایئرلائن کی جانب سے مولانا عبدالوہاب کی نماز جنازہ میں شرکت کرنے والوں کے لیے خصوصی پرواز چلائی گئی تاہم اس کے باوجود ایئرپورٹ پر شدید رش ر ہا ،مسافروں کا کہنا تھا کہ لاہور کا کرایہ 40 ہزار تک وصول کیاگیا جس پر ایئر لائنز انتظامیہ کا مؤ قف تھا کہ ریوینیو منجمنٹ سسٹم کے تحت کرائے میں اضافہ ہوجاتا ہے۔