اسلام آباد(مانیٹرنگ ڈیسک)نجی ٹی وی پروگرام میں گفتگو کرتے ہوئے پیپلزپارٹی کی خاتون رہنما و ممبر قومی اسمبلی نفیسہ شاہ نےوزیراعظم عمران خان کی قومی اسمبلی سے غیر حاضری پر ان پر کڑی تنقید کرتے ہوئے کہا ہے کہ وزیراعظم عمران خان نے اپنی پہلی تقریر میں وعدہ کیا تھا وہ پارلیمنٹ میں آکر سوالات کے جواب دیا کرینگے، ان کا کہناتھا کہ میں سابقہ وزیراعظم کی
طرح نہیں بلکہ عوام کے سامنے جوابدہ رہوں گا۔ نفیسہ شاہ کا کہنا تھا کہ بتایا جائے کہ کیا اس پارلیمنٹ میں پچھلی حکومت کو جوابدہ ہونا پڑیگا یا اس سے پچھلی حکومت کو جوابدہ ہونا ہو گایا اس حکومت کو ، موجودہ پارلیمنٹ اس حکومت کو جوابدہ رکھے گی، نفیسہ شاہ نے کہا کہ پارلیمنٹ کے باہر آج ایشوز ڈسکس ہو رہے ہیں مجھے ایک فورم پر مدعو کیا گیا تھا وہاں مجھے بتایاگیا کہ پاکستان کی پوری سٹیل انڈسٹری اس وقت آخری ہچکیوں پر آگئی ہے، مجھے یہ بتایا گیا کہ این ایچ اے کے چیکس بائونس ہو رہے ہیں اور حکومت کے تمام امور ٹھپ ہو کر رہ گئے ہیں اور یہ لوگ آئے روز بازو چڑھا کر اپوزیشن کو دھمکیاں دے رہے ہیں، حکومتی کارکردگی کہاں ہے؟ان کا ایجنڈا کہاں ہے؟اس موقع پر پروگرام کے میزبان اور معروف اینکر کاشف عباسی کا کہنا تھا کہ جب میاں صاحب مشکل میں آئیں گے تو پاکستان کی سٹیل انڈسٹری بھی پھر مشکل میں آئے گی ، تاہم فوری طورپر کاشف عباسی نے اپنی اس بات کی وضاحت کرتے ہوئے کہا کہ یہ بات میں نے ازراہ مذاق کی ہے جس پر نفیسہ شاہ نے محضوظ ہوتے ہوئے کہا کہ یہ اچھا مذاق ہے۔ کاشف عباسی نے پروگرام میں شریک وفاقی وزیر فیصل واوڈا سے سوال کیا کہ نفیسہ شاہ کہہ رہی ہیں کہ حکومت سے ملک چل ہی نہیں رہا، کہا گئے عمران خان جو خود کہتے تھا کہ وہ ایک ماہ میں دو مرتبہ پارلیمنٹ میں آکر سوالوں کا جواب دونگا
جس سے پارلیمنٹ کی نئی روایت قائم ہو گی جس پر فیصل واوڈا کا کہنا تھا کہ جو بندہ 18گھنٹے کام کرتا ہے اس کی یہ کیپیسٹی نہیں ہو سکتی ، اس نے کھانا بھی کھانا ہے ، باتھ روم بھی جانا ہے ۔ فیصل واوڈا کی اس وضاحت پر کاشف عباسی ہنس پڑے اور کہا کہ کیا یہ آپ کی لاجک ہے؟جس پر نفیسہ شاہ کا کہنا تھا کہ ان کے کہنے کا مطلب یہ ہے کہ باتھ روم تو جانا ہے مگر پارلیمنٹ نہیں جانا۔ نفیسہ شاہ کی اس بات پر کاشف عباسی نے فیصل واوڈا سے سوال کیا کہ شاید نفیسہ شاہ صحیح کہہ رہی ہیں اورٹھیک پوائنٹ آئوٹ کر رہی ہیں کہ عمران خان کا باتھ روم جانا پارلیمنٹ آنے سے زیادہ ضروری ہے۔ جس پر فیصل واوڈا نے جواب دیتے ہوئے کہا کہ قدرتی طور پر یہ بات صحیح ہے ۔
