اسلام آباد(آن لائن) فیڈرل بورڈ آف ریونیو نے ٹیکس چوروں کا سراغ لگانے کے لیے عالمی بینک کے تعاون سے آٹومیٹڈ رسک مینجمنٹ سسٹم کا پائلٹ پروجیکٹ شروع کرنے کا فیصلہ کیا ہے۔ ایف بی آر کی طرف سے آٹومیٹڈ رسک مینجمنٹ سسٹم پروجیکٹ گزشتہ ڈیڑھ سال سے التوا کا شکار ہے اب اس پر کام تیز کرنے پر اتفاق ہوا ہے اور اس حوالے سے حال ہی میں پاکستان کے دورے پر آئے ہوئے عالمی بینک کے جائزہ مشن کے ساتھ اس منصوبے کے پائلٹ پروجیکٹ کے بارے میں
تفصیلی جائزہ لینے کے اتفاق رائے ہوگیا ہے۔ فیڈرل بورڈ آف ریونیو اور پاکستان کے دورے پر آئے ہوئے عالمی بینک کے مشن کے ساتھ آٹومیٹڈ رسک مینجمنٹ سسٹم کے منصوبے کی فزیبلٹی اسٹڈی کے حوالے سے معاملات طے پاچکے ہیں۔اس جدید نوعیت کے حامل رسک مینجمنٹ سسٹم کے ذریعے ٹیکس دہندگان کی جانب سے ان کے ظاہر کردہ اخراجات و آمدنی میں فرق کے علاوہ دیگر اعدادوشمار میں بڑے پیمانے پر فرق کی نشاندہی کرکے ان کا رسک بیسڈ آڈٹ کیا جاسکے گا۔
