کراچی(آئی این پی ) اسٹیٹ بینک نے صرف ایک بینک کے علاوہ دیگر بینکوں کا ڈیٹا چوری ہونے کی رپورٹس مسترد کر تے ہوئے کہا ہے کہ دیگر بینکوں کے ڈیٹا چوری ہونے کے شواہد نہیں ملے ۔مرکزی بینک کی جانب سے جاری اعلامیے کے مطابق صرف ایک بینک کا ڈیٹا چوری ہونے کے شواہد ملے ہیں اور دیگر بینکوں کے ڈیٹا چوری ہونے کے شواہد نہیں ملے جب کہ کسی بینک یا

قانون نافذ کرنے والے ادارے نے اس حوالے سے آگاہی نہیں دی۔اسٹیٹ بینک کے اعلامیے میں کہا گیا ہے کہ 27 اکتوبر کو ایک بینک کا سیکورٹی حصار توڑا گیا تھا تاہم اس کے بعد اس طرح کا کوئی واقعہ پیش نہیں آیا۔اسٹیٹ بینک نے کہا ہے کہ سائبر خطرے کی نشاندہی اور تدارک کے اقدامات کی ہدایات جاری کردی ہیں، بین الاقوامی پیمنٹ اسکیموں سے تعاون لینے کی ہدایات بھی کی ہیں۔