اسلام آباد(آن لائن)حکومت نے ملک بھر میں بجلی چوری کی روک تھام کیلئے سمارٹ میٹرز لگانے اور اے بی سی کیبل لگانے کیلئے منصوبہ بندی تیار کرلی ہے اور جلد ہی آئیسکو اوی لیسکو میں سمارٹ میٹر لگائے جائیں گے ۔ذرائع کے مطابق حکموت نے رواں مالی سال میں پاور سیکٹر کا گردشی قرضہ 150ارب روپے تک کم کرنے کا ٹارگٹ رکھا ہے،
جس کیلئے اسمارٹ میٹر اور اے بی سی کیبل نصب کی جائیگی تاکہ چوری میں کمی لائی جاسکے ۔پاورڈویژن حکام کے مطابق ملک میں اے بی سی کیبل لگانے کا مقصد سسٹم کو اپ گریڈ کرنا اور بجلی چوری میں کمی لانا ہے ،منصوبا 5سالوں میں مکمل کیا جائیگا جس پر 5ارب ڈالر سے زائد رقم خرچ کی جائیگی جبکہ بجلی کی 2تقسیم کار کمپنیوں میں اسمارٹ میٹر لگانے کیلئے 90ارب روپے درکار ہونگے۔حکام کا کہنا ہے کہ منصوبے کی تکمیل کیلئے وزارت ایشیائی ترقیاتی بینک سے معاونت حاصل کرے گی۔اسمارٹ میٹرمنصوبے کے لیے پاور ڈویڑن نے ایشیائی ترقیاتی بینک سے رابطہ کر لیا ہے، وزارت توانائی ذرائع کے مطابق ایشیائی ترقیاتی بینک نے اسمارٹ میٹر پروگرام میں تعاون پر اّمادگی ظاہر کی ہے۔ اس سے پہلے مسلم لیگ (ن )حکومت نے ایشیائی ترقیاتی بینک کے تعاون سے اّئیسکو اور لیسکو کے لیے اسمارٹ میٹر منصوبہ شروع کیا تھا جو بعدازاں تیکنیکی مسائل کیوجہ سے بند کر دیا گیا تھا،اسمارٹ میٹر پروگرام سے ملک میں بجلی چوری کے روک تھام میں مدد ملے گی۔حکومت کی جانب سے کنڈا سسٹم کے خاتمے کے لیے اے بی سی تاریں بچھانے کا منصوبہ بھی لگایا جائیگا۔ذرائع کے مطابق اس وقت ملک میں پاور سیکٹر کا گردشی قرضہ 13سو ارب سے بھی زائد ہے اور روزانہ اربوں روپے کا نقصان ہو رہا ہے ۔ذرائع کا مزید کہنا ہے کہ بجلی چوری کی روک تھام کیلے ٹاسک فورسز بھی اپنا کام جاری رکھیں گی تاکہ بجلی چوری میں مزید واضح کمی لائی جاسکے۔
