لاہور (نیوز ڈیسک) پاکستان کرکٹ بورڈ کے چیئرمین نجم سیٹھی کی ہتک عزت کی درخواست پر سماعت کرتے ہوئے عمران خان کو دوبارہ نوٹس جاری کر دیا گیا، سیشن عدالت نے نجم سیٹھی کی درخواست پر سماعت کرتے ہوئے عمران خان کو دوبارہ نوٹس جاری کرتے ہوئے جواب طلب کر لیا ہے۔ پی سی بی کے چیئرمین نجم سیٹھی کی درخواست پر ایڈیشنل سیشن جج انجم ممتاز نے سماعت کی، نجم سیٹھی نے درخواست میں موقف اختیار کیا کہ تحریک انصاف
کے چیئرمین عمران خان نے مختلف سیاسی جلسوں میں کرپشن کے جھوٹے الزامات لگائے، جس کی وجہ سے میری شہرت کو نقصان پہنچا۔ نجم سیٹھی نے درخواست میں عدالت سے استدعا کی کہ شہرت کو نقصان پہنچانے پر عدالت عمران خان کو دس کروڑ ہرجانہ ادا کرنے کا حکم دے، وکلاء کے دلائل سننے کے بعد عدالت نے تحریک انصاف کے چیئرمین عمران خان کو دوبارہ نوٹس جاری کرتے ہوئے 16 اگست تک جواب طلب کر لیا ہے۔
