پشاور(مانیٹرنگ ڈیسک)اے این پی کے رہنما ہارون بلور پر خود کش حملے میں ملوث مبینہ سہولت کار  گرفتار،خودکش حملہ آور کی دھماکے سے قبل ہوٹل میں رہائش کی تفصیلات بھی حاصل کر لی گئیں ۔نجی ٹی وی کے مطابق سانحہ یکہ توت خود کش حملے کے بعد حسا س اداروں نے دھماکے کے مبینہ  سہولت کار رحیم عرف ابو اخلاص نامی شخص کو گرفتار کر لیا ہے ، ذرائع کا کہنا ہے کہ ابو اخلاص نے ابتدائی تفتیش میں ابو حمام گروپ سے تعلق کی تصدیق کی ہے۔

دوسری جانب خود کش حملہ آور کی دھماکے سے ایک رات قبل پشاور سٹی کے ایک ہوٹل میں رہائش پذیر ہونے کی تفصیلات حاصل کر لی گئی ہیں۔ذرائع کا کہنا ہے کہ حسا س اداروں کی جانب سے ہوٹل کے سی سی ٹی وی کیمروں کی ریکارڈنگ تحویل میں لے لی گئی ہیں جس سے خود کش حملہ آور کی ہوٹل میں موجودگی اور رات گزارنے کے بارے میں جانچ پرتال کی جا رہی ہے جس میں اہم انکشافات متوقع ہیں ۔واضح رہے کہ اس حملے میں ہارون بلور سمیت 22افراد شہید ہوئے تھے۔