لاہور ( مانیٹرنگ ڈیسک) قومی احتساب بیورو (نیب )لاہور کو سابق وزیر اعظم محمد نوازشریف اور انکی صاحبزادی مریم نواز کو لاہور سے اڈیالہ جیل منتقل کرنے کیلئے ہیلی کاپٹر فراہم کردیا گیا۔نجی ٹی وی کے مطابق نوازشریف اور مریم نواز نے 13 جولائی کو وطن واپسی کا اعلان کر رکھا ہے جبکہ نیب نے انہیں لاہور سے ہی اڈیالہ جیل منتقل کرنے کا فیصلہ کیا ہے۔
نیب لاہور کے ڈائریکٹر شہزاد سلیم نے چیئرمین نیب جسٹس (ر) جاوید اقبال کو خط لکھا تھا جس میں نوازشریف اور مریم نواز کی اڈیالہ جیل منتقلی کے لیے ہیلی کاپٹر فراہم کرنے کی درخواست کی گئی تھی۔ذرائع کا کہناہے کہ ڈی جی نیب لاہور کے خط کا چیئرمین نیب نے مثبت جواب دیا ہے اور نوازشریف، مریم نواز کی لاہور ائیرپورٹ سے اسلام آباد منتقلی کے لئے ہیلی کاپٹر فراہم کردیا گیاہے۔واضح رہے کہ اسلام آباد کی احتساب عدالت نے ایون فیلڈ ریفرنس میں نوازشریف کو 11، مریم نواز کو 8اور ان کے شوہر محمد صفدر کو ایک سال قید بامشقت کی سزا سنائی ہے۔
