بہاولنگر(نیوز ڈیسک) بہاولنگر میں مسلم لیگ ن کا صفایا ہوگیا ہے اور آئندہ عام انتخابات کیلئے تمام امیدواروں نے مسلم لیگ ن کا ٹکٹ قبول کرنے سے معذرت کرتے ہوئے آزاد حیثیت میں الیکشن لڑنے کا اعلان کردیاہے۔ تفصیلات کے مطابق انتخابات 2018کیلئے بہاولنگر سے کوئی بھی امیدوار مسلم لیگ ن کے ٹکٹ پر الیکشن لڑنے کیلئے راضی نہیں ہوا۔ اس طرح بہاولنگر سے مسلم لیگ ن کا مکمل صفایا ہوچکا ہے۔ بہاولنگر کی تحصیل منچن آباد
اور قومی اسمبلی کے حلقے این اے 166سے گزشتہ عام انتخابات میں آزاد حیثیت میں کامیاب ہوکر مسلم لیگ ن میں شامل ہونے والے سید محمد اصغر شاہ انتخابات 2018میں تحریک انصاف کے امیدوار ہیں اور بلے کے نشان پر انتخابات میں حصہ لے رہے ہیں جبکہ پی پی 237سے مسلم لیگ ن کے ٹکٹ پر منتخب ہونے والے فدا حسین اور پی پی 238سے شوکت لالیکا نے بھی آزاد حیثیت میں انتخابات میں حصہ لینے کا فیصلہ کیا ہے۔
