اسلام آباد(این این آئی)شہر اقتدار کی جانب لانگ مارچ اور دھرنوں کے اعلانات کے بعد اسلام آباد اور راولپنڈی کی انتظامیہ نے الگ الگ سیکیورٹی پلان تیار کرلیے۔

ذرائع کے مطابق جڑواں شہروں میں کنٹینرز اور رکاوٹیں لگا کر اہم راستے بند کرنے کی تیاریاں تیز کردی گئی ہیں جبکہ دوسرے صوبوں سے پولیس نفری بھی پہنچنا شروع ہوگئی۔اسلام آباد میں 26نمبر چونگی، فیض آباد، کشمیر ہائی وے اور مری روڈ سمیت اہم شاہرائوں پر بڑی تعداد میں کنٹینرز پہنچا دیے گئے۔

ریڈ زون جانے والے تین راستے سیل کردیئے گئے، دیگر راستوں پر صورتحال کے مطابق رکاوٹیں لگائی جائیں گی۔ذرائع کے مطابق راولپنڈی میں سیکیورٹی پلان کے تحت 11ہزار سے زائد پولیس اہلکار تعینات کیے جائیں گے۔راولپنڈی کے 26داخلی راستے بند اور 72مقامات پر رکاوٹیں لگانے کا فیصلہ کیا گیا ہے۔اڈیالہ جیل جانے والے 8راستے بھی بند کیے جائیں گے، جبکہ اندرون شہر 50مرکزی گلیاں بند کرنے کی تیاری کرلی گئی ہے۔