اسلام آباد (نیوز ڈیسک) صدرِ مملکت آصف علی زرداری نے وزیرِ اعظم کی سفارش پر اسلام آباد ہائیکورٹ کے جج جسٹس طارق محمود جہانگیری کی ڈی نوٹیفکیشن کی منظوری دے دی ہے۔دنیا نیوز کے مطابق، اسلام آباد ہائیکورٹ کی جانب سے ان کی تقرری کو غیر قانونی قرار دینے کے فیصلے کے بعد صدر نے باضابطہ طور پر اس ڈی نوٹیفکیشن پر دستخط کیے۔
وزارتِ قانون و انصاف نے بھی اُن کی برطرفی کا نوٹیفکیشن جاری کر دیا ہے۔یاد رہے کہ اسلام آباد ہائیکورٹ نے ڈگری سے متعلق مقدمے میں فیصلہ سناتے ہوئے جسٹس طارق محمود جہانگیری کی بطور جج تقرری کو کالعدم قرار دیا تھا اور انہیں فوری طور پر عہدے سے ہٹانے کا حکم دیا تھا۔ چیف جسٹس سردار محمد سرفراز ڈوگر اور جسٹس محمد اعظم خان پر مشتمل ڈویژن بینچ نے اپنے فیصلے میں کہا تھا کہ جسٹس جہانگیری کے پاس وہ ایل ایل بی ڈگری موجود نہیں تھی جو اضافی جج یا مستقل جج بننے کے لیے درکار ہوتی ہے۔
