اسلام آباد (نیوز رپورٹ) وزیراعظم کے مشیر رانا ثناء اللہ کے حالیہ بیان پر تحریک انصاف نے شدید تنقید کرتے ہوئے کہا ہے کہ انہوں نے شہداء کے خون کا بدلہ نہ لینے کا اعلان کرکے قومی وقار کو مجروح کیا ہے۔
تحریک انصاف کی جانب سے جاری کردہ ردعمل میں کہا گیا کہ بھارتی جارحیت کے نتیجے میں شہری علاقوں اور مساجد کو نشانہ بنایا گیا، درجنوں پاکستانی شہید ہوئے، مگر حکومتی رویہ مایوس کن ہے۔ پی ٹی آئی کے مطابق رانا ثناء اللہ کا بیان نہ صرف کمزوری ظاہر کرتا ہے بلکہ اس سے دشمن کو غلط پیغام گیا ہے۔ پارٹی نے یہ بھی الزام عائد کیا کہ حکمران جماعت اور شریف خاندان نے مودی کا نام تک زبان پر نہ لا کر اپنی بے حسی کا ثبوت دیا ہے۔
بیان میں مزید کہا گیا کہ موجودہ قیادت قومی غیرت، عزت اور خودمختاری کو ذاتی مفادات پر قربان کر رہی ہے، اور ایسے نازک وقت میں قوم کو عمران خان جیسے نڈر اور بااصول رہنما کی ضرورت ہے جو ملک کے دفاع میں واضح اور دوٹوک مؤقف رکھتا ہو۔
یاد رہے کہ وزیراعظم کے مشیر برائے سیاسی امور رانا ثناء اللہ نے گزشتہ روز صحافیوں سے گفتگو کرتے ہوئے کہا تھا کہ پاکستان نے بھارتی حملے کا مؤثر جواب دیا ہے، اور اگر بھارت مزید کوئی اقدام نہیں کرے گا تو پاکستان بھی مزید ردعمل نہیں دے گا۔ ان کا کہنا تھا کہ پہل بھارت نے کی تھی، لیکن پاکستان نے ذمہ دار ریاست کے طور پر صرف دفاعی اقدام اٹھایا۔
رانا ثناء اللہ نے یہ بھی واضح کیا کہ پاکستان عالمی برادری کو باور کروا چکا ہے کہ وہ تحقیقات کے لیے ہر فورم پر خود کو پیش کرنے کے لیے تیار ہے، اور پہلگام واقعے کی غیرجانبدار تفتیش کا خیرمقدم کرے گا۔
