اسلام آباد (نیوز ڈیسک)پاکستان پیپلز پارٹی (پی پی پی) کے چیئرمین بلاول بھٹو زرداری امریکی صدر ڈونلڈ ٹرمپ کے صدارتی ناشتے میں شرکت کے لیے امریکا روانگی کے ارادے سے کراچی ایئرپورٹ پہنچے، تاہم اچانک اپنا سفر ملتوی کرتے ہوئے واپس بلاول ہاؤس چلے گئے۔
ذرائع کے مطابق بلاول بھٹو زرداری کو دبئی کے راستے امریکا جانا تھا، اور ان کی اور ان کے سیکیورٹی عملے کی بورڈنگ مکمل ہوچکی تھی، لیکن انہوں نے غیر متوقع طور پر دبئی جانے کا ارادہ ترک کر دیا اور ایئرپورٹ سے واپسی اختیار کرلی۔قبل ازیں اطلاعات تھیں کہ بلاول بھٹو زرداری امریکا روانہ ہو چکے ہیں، جہاں وہ دبئی میں مختصر قیام کے بعد امریکی صدر ڈونلڈ ٹرمپ کے ناشتے میں خصوصی دعوت پر شرکت کریں گے۔ تاہم، تازہ ترین اطلاعات کے مطابق، انہوں نے دبئی کا سفر مؤخر کر دیا ہے، لیکن یہ واضح نہیں ہو سکا کہ وہ امریکا روانہ ہوں گے یا نہیں اور آیا وہ صدارتی ناشتے میں شرکت کریں گے یا نہیں۔
