اسلام آباد (مانیٹرنگ ڈیسک) مختلف سیاسی جماعتوں کی جانب سے پولنگ اسٹیشنز پر پولنگ ایجنٹس کو باہر نکالنے کی خبروں اور فارم 45 مہیا نہ کرنے کی خبروں کا جواب دیتے ہوئے سیکرٹری الیکشن کمیشن بابر یعقوب نے کہا کہ کس حلقے میں رزلٹ نہیں دیے جا رہے، میں اس پر ایکشن لیتا ہوں، اگر کہیں ایسا واقعہ ہو رہا ہے تو اس کا تدارک کیا جائے گا، کسی بھی پولنگ اسٹیشن اور کسی بھی حلقے کے اندر ایسا کچھ نہیں ہوا ہے، انہوں نے کہا کہ فارم 45 کی کوئی کمی نہیں ہے، انہوں نے کہا کہ

پولنگ سٹیشنز کو کہتا ہوں کہ اگر فارم کمی ہے تو فوراً بتائیں، سیکرٹری الیکشن کمیشن نے کہا کہ فارم نہیں ملا تو تفصیلات سے آگاہ کیا جائے، کسی بھی امیدوار کو شکایت ہے تو بتائے اس کا ازالہ کریں گے، انہوں نے کہا کہ ایک کے بجائے دو تین پولنگ ایجنٹس پولنگ اسٹیشن کے اندر آ جاتے ہیں لیکن قانون یہ ہے کہ ایک وقت میں صرف ایک پولنگ ایجنٹس اندر ہو گا، انہوں نے کہاکہ ہم آپ کو خود مکمل رزلٹ دیں گے میڈیا اپنے ذرائع سے رزلٹ دے رہا ہے۔ الیکشن کمیشن نے مسلم لیگ ن کے پولنگ ایجنٹس کو پولنگ اسٹیشنوں سے باہر نکالنے کے الزام کی تردید کر تے ہوئے کہا کہ سیاسی رہنما بغیر کسی ثبوت اس قسم کے سنگین الزامات سے گریز کریں،، قواعد کے مطابق ایک پولنگ اسٹیشن پر گنتی کے وقت ایک پارٹی یا امیدوارکے ایک ہی ایجنٹ کو بیٹھنے کی اجازت دی جاتی ہے۔بدھ کو ترجمان الیکشن کمیشن نے مسلم لیگ ن کے رہنماؤں کے اس الزام پر کہ ان کے پولنگ ایجنٹس کو پولنگ اسٹیشنوں سے باہر نکال دیا گیا ہے پر وضاحت کر تے ہوئے کہا کہ صوبائی الیکشن کمشنر پنجاب نے اس واقعہ کی سختی سے تردید کی ہے اور کہا ہے کہ سیاسی رہنما بغیر کسی ثبوت اس قسم کے سنگین الزامات سے گریز کریں۔ الیکشن کمیشن اس طرح کے بے بنیاد الزامات کی سختی سے تردید کرتا ہے۔ اس حوالے سے ڈی۔آر۔او لاہور، راولپنڈی اور ریجنل الیکشن کمشنر راولپنڈی نے بھی بڑی سختی سے تردید کی ہے، قواعد کے مطابق ایک پولنگ اسٹیشن پر گنتی کے وقت ایک پارٹی یا امیدوار کا ایک ہی ایجنٹ کو بیٹھنے کی اجازت دی جاتی ہے۔