اسلام آباد(مانیٹرنگ ڈیسک) مسلم لیگ ن کے رہنما سینیٹر پرویز رشید نے الزام لگایا ہے کہ گرفتاری کے وقت سابق وزیر اعظم نواز اور ان کی صاحبزادی سے لاہور اور اسلام آباد ائیرپورٹ پر بدسلوکی کی گئی ان کی تصاویر اور فلمیں بنائی گئیں اور اپنی جگہ سے حرکت نہ کرنے کا حکم بھی دیا گیا نگران حکومت اور سپریم کورٹ نوٹس لیں کیونکہ قومی رہنماؤں کی تذلیل کی کھلی چھوٹ نہیں دی جاسکتی ۔ احتساب عدالت کے باہر میڈیا سے گفتگو کرتے ہوئے مسلم لیگ ن
کے رہنما سینیٹرپرویز رشید نے کہا کہ سابق وزیر اعظم نواز شریف اپنی اہلیہ اور ان کی صاحبزادی مریم نواز اپنی والدہ کو انتہائی تشویشناک حالت میں چھوڑ کر گرفتاری دینے پاکستان آئے لیکن قانون نافذ کرنے والے اداروں اور نیب حکام کی طرف سے ان کے ساتھ توہین آمیز سلوک روا رکھا گیا پہلے لاہور ائیرپورٹ اور بعد ازاں اسلام آباد ائیرپورٹ پر بھی نواز شریف اور مریم نواز کے ساتھ بدسلوکی کی گئی ۔نگران حکومت اور سپریم کورٹ اس کا نوٹس لے۔
