لاہور(مانیٹرنگ ڈیسک) نگران وزیراعلیٰ پنجاب  حسن عسکری کی ہدایت پر وزیراعلیٰ آفس میں کفایت شعاری کی پالیسی پر عملدرآمد کا آغاز کر دیا گیا ۔ جس کے تحت وزیراعلیٰ آفس میں تعینات 151افسروں اور عملے کو متعلقہ محکموں میں واپس بھیج دیا گیا ہے جبکہ مختلف محکموں سے لون بیسز پر آئے ہوئے 113 افسروں اور عملے کی خدمات بھی متعلقہ محکموں کے سپرد کر دی گئی ہیں-

ترجمان وزیراعلی آفس نے کہاکہ وزیراعلی آفس میں تعینات مجموعی طو رپر 264افسروں اورعملے کی خدمات متعلقہ محکموں کے سپر د کی گئی ہیں-ترجمان نے مزید کہاکہ نگران حکومت کی سرکاری امور کی انجام دہی کے لئے ضروریات کو مد نظر رکھ کروزیراعلی آفس میں صرف ضروری افسروں اور عملے کو رکھا گیاہے۔ترجمان نے کہاکہ وزیراعلیٰ آفس میں ضروری افسر اور عملہ سرکاری فرائض کی انجام دہی کے لئے مامور رہے گا۔عوام کی جانب سے نگران وزیر اعلیٰ پنجاب کے اس اقدام کو سراہا گیا ہے۔